Act 26 | ASO | STEP | Ne'mine lavo Agilipa' aza Paulo'ni ti' lo lo-imine': Gasika monovoka lanivo gelelone lo nogele gimuve. Nemu' lozo. Lavo Paulo' aza ana do oto ei' monovo've ti' lo lo-ngimine':

Acts 26

Agilipa' Velelo' Paulo' Aza Ei' Monovo Lo-imine' Gamazi

1 Ne'mine lavo Agilipa' aza Paulo'ni ti' lo lo-imine': Gasika monovoka lanivo gelelone lo nogele gimuve. Nemu' lozo. Lavo Paulo' aza ana do oto ei' monovo've ti' lo lo-ngimine': 2 Guvekasi ve Agilipazo, gaza nene Zuda velite ogo molo oga' noune' monotemu' gate ato' ato' gelo lute vo eza ema oga' neine' initekumu' gele naine' nenako nemu' Zuda ve goni' i-nidani' inite' mukito' do tine' molo lo neze monovo'ne gei' vekalo' lo soto' olosa mulu'neu' lamine' gele nouve. Nemu' gaza gelanivo mulungau' hongu nolivo gamazi'ne lolove.

4 Naza umungive ngomoloti' neze zuhoti vovo'ningukisi ido' Zelusalemi ebekukisi mino naba ogo inite' muki' ogo molo minuvoni' monovo'ne nene Zuda ve mukilite gili nizave. 5 Leli' Zuda veti monoku' evene' mulise ato' atoli'mine minangu' mulise hamo' mali'mo nene monokuti' gamazi vai' laa' ani' nene gele dalosa amuzo molo mulise muki' ngivile' ogo neine' mulise ado' Halisaio' aleve ve langu' nene naza vo gi'mizo minosa Halisaio' ve lolo' ogo minuvoni' nenako ingine gamene gala'mudati' vomine neni' monovo'ne ningani' nene lo soto' olone ladini ha li soto' adine. 6 Ido' O'moso'mo salani gamazi lo avotemotine lo huko lo-ngimine' nene gihile izelive lo gele amuzo molo gizebo ogo nouvongumu' mene gonito' nele'mizi nimilavo idi'nise ote nouve. 7 Nouvoni'za a'mine salani gamazi neve leze Zuda veti zuho tuvelu ingine gihile izelive li gili gizebo igi mini go' laneme go' laneme vo'ine gilingili ivo O'moso opo'ni li gelekele' i-di minaa' nave. Guvekasi ve make, naza a'mine salani gamazimu' nene gele ele'vole' ogo nouvongumu' ingine a'mine'mine igi minaa' ave Zuda ve nete gonito' nele'mizi nimilave. 8 O'moso'mo hilani' aleve ngele'mize otaa' neingumu' nene lingine nanimu' ne'mine osa'mive li gilave. Ne'mine li-gilamilizado' o neive.

9 Ido' gozopo' nene na'nise'ne neve Nasalete ve Izesu' mono' do goloso olosa gono naba dalove lo ga'ne gelaa' uvoni' ma neive. 10 Ne'mine lo gelo Zelusalemi numungu' api' ogo a'mine gono duvoni'. Eveneto' medeli mini O'moso inite' lehizi-daa' ave naba engita lokuvo ingine luhuvo nite' nimikevo Izesu' evenele zuho muki' do nala' numungu' hulo-ngiduvoni'. Ne'mine okuvo ngibilikevo hililizave likevo voti hizo a'mine gamazi hize ele' uvoni' ma neive. 11 nGebelekuvo Guvelesi ve Izesu'ni divi ledivi' ilizave lo Zuda veti mono' numuno'ine mukiku' gamene muki' ngebelaa' uvoni' ma neive. Ne'mine ogo engikumu' nizebolo' goloso do mino heta ato' veti numuno ebe'ningu' minangukisi goboni molo-ngedo minaa' uvoni' ma neive.

Paulo' Aza Lulo Do Velepe' Izingumu' Lo-ngimine' Gamazi

(Aposolo' 9:1-19; 22:6-16)

12 Ne'mine nouvo eveneto' medeli mini O'moso inite' lehizi-daa' ave nete luhuvo nite' nimikevo engi' ve'inemu' ogo Damasiko numuda volove lo novuvo 13 ho' omo oluso' neivo, ee, guvekasi ve, Okulumokuti' labana' ma ho' ivile' ogo lemo nezesi ido' maka' vunivesi hize vodo vodo o-ledavo ninguvoni' ve. 14 Hize vodo vodo o-ledavo misubou' lemo gote hizo ongo nonivo Hebilaio' gamaziuti' gamazi ma nenikumu' ti' lo nolivo giluve: Saulo, Saulo, gaza nanitekumu' goboni nomolo-nedane. Bulumaka' ize a'manapa igi me'ningine gize'ine gavoso ngibililisa iga' adi'mino gaza a'mine'mine ogo nebelelesa ane'za ize me'ninge mulu' izi di minani' gavosolo' hizi mulumo gilaa' adi'mino gazasi a'mine'mine ogo mulumo nogelane. 15 Ne'mine lavo naza Guvekasi ve gaza zaho ve lokuvo aza ti' lo lo-nimine': Gaza goboni molo-nedaa' anive Izesu' ma ne noluve. 16 Ido' gaza oto gizenga lise gili' lo minezo. Gaza nene neni' gelekele' izipe mineline losa naza gele'mize molalosa soto' nopize gimuve. Ne'mine okuvo ningane' inite' nemukisi ido' alinge' soto' o gemekuvo ningeline' nemukisi lo soto' o ngeme ngeme' ogo mineline lo gele'mize nomuluve. 17 Zuda veti a'ningutikisi ido' heta ato' veti a'ningutikisi do gu' ize-gedo minelesuve. Ne'mine ogo a'mine heta ato' vetida nogimiseluve. 18 Gimiselekuvo vo engita gono danivo lu'ine ga'ine ngolo' lavo goloso inite' ningi mehe'ine imi lu'ine'mi labana' di lehizilizave. Ne'mine igi Satani'mi anau' mini gelekele' i-di minani' nene huli O'moso'mi anau' igi minilizave. Ne'mine igi nenikumu' gili ele'vole' ikevo O'moso'mo lihime'ine hulo-ngedo eze zuho do kegeso do ti' ine' alevetingu' mo'mosi'ine ngemeleseive lo lo-nimine'.

Paulo' Aza Mono' Gono Dangumu' Nene Agilipanginesi Lo-ngimine' Gamazi

19 Ne'mine lo-nemavo, Guvekasi ve Agilipazo, a'mine Okulumoku' minive'mo ve'nelo' o molo lo-nimine' gamazi gele hulamuve. 20 A'mine gamazi gele do gana' api' ogo Damasiko aleve lo-ngemo ido' alinge' Zelusalemi aleve ido' Zudaia misubou' aleve ido' heta ato' ve nizani' inginesi lu'ine di velepe' izi O'mosola vi gi'mizi lute do velepe' izali'mi aka gihilelo' imine' mili inite' lisihe' laminekovo' igi mili minilizave lo nene gamazi lo-ngeme ngeme' ogo minuvoni' ve. 21 Ne'mine oga' uvoni' nemu' Zuda ve ingine mono' numuno nabau' a'nelo' di nibili hililisa navo 22 O'moso'mo alete molo nele'mize lamine' o'mo novivo mono' nene evene' dizi minani' ido' limi minani' muki' lo-ngemaa' nouve. Ne'mine ogo gamazi gohi ma lo-ngemesa'muve. O'moso'mi gamazi li soto' iga' avesi Mosekisi alinge' soto' iline' initekumu' li hukani' gamazivo' lo-ngemo ti' lo lo-ngemaa' nouve. 23 O'moso'mo do lu' izelive lo imiselelesa live nene mulumo gelo helelive li ido' hilave engitati' do gomu' molo-ngedo oto Zuda ve lezelasi ido' heta ato' ve engitasi labanali'mi gamazi do soto' o-ngedelive li li huki-dani' gamazi nene lo soto' ogo lo-ngemaa' nouve.

Paulo' Aza Agilipa'ni Izesu' Mono' Gele Ele'vole' Ilive Lo Gala Dani' Gamazi

24 Ne'mine lo Paulo' aza monovo've lo soto' ogo nolo-ngimivo Hesito' aza gamazi naba lo ti' lo line': Paulo' gaza mo negi nohizane. Luhuvo nite' muki' gato gelo minaa' ane' ma'mo godoka gopo ogavo negi nohizane. 25 Ne'mine lavo Paulo' line': Hesito' gaza ve naba make, naza negi hizamuve. Gamazi gihile lamine' nene noluve. 26 Mene noluvoni' gamazi nene guvelesi ve naba Agilipa' aza gele neive. Ve'ne lapa nomivo ezela lovo' kiselevo' ogo lolosuve. Noluvo inite' nene haleko soto' ine' nominako guvelesi ve ningo gelamine' nevoba mo ningo gele neive lo gele nouve. 27 Guvekasi ve Agilipazo, O'moso'mi gamazi li soto' iga' aveti gamazi nene gele ele'vole' abe. Gele ele'vole' o nane' nene gele nouve. 28 Ne'mine lavo Agilipa' aza Paulo'ni ti' lo lo-imine': Gamene ahovo ngomo gamazi nolanivo neni' nene Kilisito' evenele lolo' ilive losa nolabe. 29 Ne'mine lavo Paulo' ti' lo lo-imine': Gamene ha'na nehe li'nibe nehe nemu' lamuve. Na'nise nene Kilisito' evenele lolo' iline losa nevo' nene gele nouve. Nemu' nene gezesi evene' lingesi gamazi noluvo nigilave lingine muki' nene neni' gidini lili' ilizave losa O'mosola noluve. Noluvoni' nene neni' a'nelo' seni nala' izi-nidi nizani' ne'mini izi-lingidilizave losa lamuve.

30 Ne'mine lo lavo guvelesi ve naba Agilipa' azasi ngamani nabasi ido' Belenikekisi ido' engikisi minave lingesi oti 31 heta limi ti' li li volelo' melo ani': Ve mene lihime apaso bele helelone' monovo nehe ido' nala' numungu' minaa' monovo nehe eita nomive. 32 Ne'mine likevo Agilipa' aza Hesito'ni ti' lo lo-imine': Loma veti guve'inesi ve naba Kaesale' goni'ne gele-nedelive lo lamidini kuluhize-danivo vidine.